'ay' loS

Sagh yaS wa'DIch 'ej ngoDmey neH jatlh. “jorpu' nuH HoS 'och. chevpu' nIH HanDogh. nIjtaH nIn. loj jonwI' yInroH. nIH nuH DIlo'laHbe'. chaq poS DIlo'laH. wej vISov.”

jatlhtaHvIS yaS, Hu'meH vajar poS ghop lo' 'ej quSDajDaq ba'choH. 'oy' 'angchugh qabDaj vaj Duj Dotlh qelba' 'e' luHar yaSpu'.

HanDogh HutlhtaHvIS DuHbe'ba' pIvghor. DeghwI'vaD jatlh vajar, “Hongghor?”

“'aqroS bID Do. ... lolSeHcha ghajchugh, HoD” jang DeghwI'. Qupqu' ghaH. motlh ghu'vam pavvaD Degh SeH HoD. 'ach Duj vuv DeghwI' Qup--'ej cha' ghop lo'laH.

“yIDaj.” jatlh vajar. “yItor neH. yIruQchu'.” chIch may' Hol jun 'ej moHaq lo'. pav ghu' 'a may' 'oHbe'. moDnISbe' 'ej yepnIS. SeHlaw Hot DeghwI' 'ej QIt ghIr Duj 'et. mev 'ej Salqa'.

“maj,” jatlh vajar. “yIDer.”

“lu' HoD.” loQ tlhe'choH Duj. poSDaq tlhe'taHvIS loQ Qom 'ach Qom DeghwI' ghop 'e' leghlaH vajar. motlh Duj SeHmo' De'wI' DaH Qatlh DeghwI' Qu'. nIHDaq tlhe'choH. HaStaDaq logh wewmoH nIjtaHbogh nIn.

“yIron” ra' vajar. ronchoH Duj. Hab, 'a ngaDtaHmeH vIHqu' DeghwI' ghopDu'. rontaH 'ej yoychoH Hovmey. DIngba' Duj'e' 'a Do' Qapchu'mo' tlham ngeb, yoylaw' Hovmey. rontaH Duj ghIq DerchoH 'ej torchoH. Habbe' 'a ron 'e' mev.

"'eDSeHcha vIlo'nISta'," jatlh DeghwI'.

lolSeHcha pat luyajmo' Hoch yaS, jatlhbe'. pIch ghajbe' DeghwI'. chaq Duy'mo' Qapbe' je Hongghor.

"vagh vatlhvI' Hong yIchu'," ra' HoD. quSDaj 'uchqu' ghaH poS ghop 'ej chorDajDaq 'oy'taH ghaH nIH ghop. Hongghor chu' DeghwI'. Qombej Duj 'ej ronqa'. ngaDtaHmoHmeH vumtaH DeghwI'.

pat Dotlh jIH HoD 'ej "mev!" jatlh. Hongghor chu'Ha' DeghwI'. DIngtaH Duj.

jatlh yaS wa'DIch, SeHlawDaj bejtaHvIS, "lujlaw'pu' Hongghor QuQ peQchem lIngwI' ngaDmoHwI'."

"Som pujmoHpu'mo' HanDogh Hongghor cherghlaHbe'." jatlh vajar. "yIntagh."

"Qaplaw'taH" SIbI' jang yaS wa'DIch, montaHvIS. Hagh 'e' ngIlpa' DeghwI', HoD bej. HaghchoHDI' HoD Hagh je DeghwI'. chIch HoD yajHa'ta' yaS wa'DIch, 'a chIch 'ebvetlh nobta' vajar HoD. Sov neH 'ach tlhob neHbe'pu'. HaStaDaq DIngtaH Hovmey.

2 comments:

  1. Qov: DeghwI'vaD jatlh HoD, yIDaj. DeghwI' Daj poQbe'bej, 'a lolSeHcha Daj neH neH HoD. tob neH.

    Duj vIHtaHghach DaDelchu'. 'orwI' SoH vaj 'e' vIqawqa'.

    ReplyDelete
  2. _yIDajmoH_ jatlhbe'. tobchu' 'e' pIHbe'. Dajpu'DI' chaq tob, 'ach tobmeH ghaytan DajnIS. (cha' qechmey pIm 'oS mu' ).

    nuq bop bom vIlaDDI' jIH, jIHagh. Duj vIHtaHghach vIDel, 'ej yInSIp, puch, Soj boptaH. DujDaq potlhqu' yIn 'utwI'meyvam'e' qelbe'taHbogh puvbe'wI'. 'orwI' ghaHbej qonwI''e'.

    - Qov

    ReplyDelete